കുന്നിക്കുരു

കറുത്തു പോയത് കൊണ്ട്
കുലത്തിൽ നിന്ന് പുറത്താക്കിയവൻ

തപ്പാൽപെട്ടി

പ്രണയവും പരിഭവങ്ങളും
വിരഹവും നൊമ്പരങ്ങളും
പങ്കുവച്ചെഴുതിയതെല്ലാം
രണ്ടു വാക്കിൽ കുറഞ്ഞുപോയെന്നു
അറിയാതെ കാത്തുനിൽക്കുന്നു
ഒഴിഞ്ഞ വയറുമായി ചില
തുരുമ്പിച്ച തപ്പാൽപെട്ടികൾ

അടക്കം

മരിച്ചവന്റെ അടക്കു കഴിഞ്ഞു..
നാട്ടുകാർ നാല് നല്ലവാക്ക് പറഞ്ഞു..
ഒളിച്ചിരുന്ന കണക്കുപുസ്തകത്തിലെ
കടങ്ങൾ മെല്ലെ പൊന്തിവന്നു..
ഒന്നിച്ചിരുന്ന നിലം
അളന്നു മുറിക്കാൻ അവകാശികൾ വന്നു..
കരഞ്ഞവരും കൂട്ടിരുന്നവരും
കണക്കു പറഞ്ഞു..
പറമ്പിലൊരു കാകൻ
ബലിച്ചോറിന് കരഞ്ഞു

പൂരം

പൂരം കൊടിയിറങ്ങി..
വാങ്ങാതെ വിട്ട ബലൂണുകൾ..
അണിയാതെ പോയ കുപ്പിവളകൾ..
നുകരാതിരുന്ന മധുരങ്ങൾ..
തിരഞ്ഞു പോകുന്നെന്റെ മനസ്സിന്നും.

പട്ടിണിക്കാരന്റെ പ്രണയം

ഭംഗിവാക്ക് കൊണ്ട്
മൂടാൻ എനിക്ക് ആകില്ല
നിന്നെ വാഴ്ത്തി പാടാൻ
എന്നിൽ കവിത ഇല്ല
പട്ടുമഞ്ജതിൽ ഇരുത്താൻ
പട്ടിണി സമ്മതിക്കില്ല
പിന്നെ പ്രേമമാണെന്നു
പറഞ്ഞിട്ടെന്തു കാര്യം?

കുപ്പിവള

പഴയ കുപ്പിവളകൾ
കയ്യിൽ കയറാതെ ഉടക്കി നിൽക്കുന്നു
പഴമയിലേക്ക് മടങ്ങിപ്പോകുന്ന എന്നെയവർ
തടഞ്ഞു നിർത്തുന്നു

ജാതി

നമ്മുടെ നിറമൊന്നല്ലെന്നു..
നമ്മുടെ കുലമൊന്നല്ലെന്നു..
നമ്മുടെ കോവിൽ ഒന്നല്ലെന്ന്..
നമ്മുടെ ദൈവം ഒന്നല്ലെന്ന്..
സ്നേഹിച്ചു ജീവിക്കാൻ
ഇതൊന്നും നോക്കിയില്ലേൽ..
ഒരുമിച്ചു വാഴുവാൻ
നമുക്കൊരുലകമില്ലെന്ന്..

പെട്ടി

പഴയ പെട്ടികൾ നീയൊന്നു
പരതി നോക്കണം
കളഞ്ഞുപോയ പ്രണയം
അവിടെയെങ്ങോ മറഞ്ഞിരിപ്പൂ

ഓട്ടോഗ്രാഫ്

എന്നെ ഓർമിക്കാൻ ആയിരം
ഓർമകൾ നിനക്കുണ്ടെന്നോർത്തു..
രണ്ടുവരി എഴുതാതിരുന്ന ഓട്ടോഗ്രാഫിൽ..
എനിക്കൊരു പുറം നീ കാത്തുവച്ചിട്ടുണ്ടെങ്കിൽ..
ഇന്ന് ഞാനൊരു വരിയെഴുതാൻ വെമ്പുന്നു..
എന്നെ നീ ഓർമിക്കാൻ
രണ്ടക്ഷരം വേണമെങ്കിൽ..
ഇന്ന് ഞാനൊരു വാക്കിനായ് തിരയുന്നു..

ആവണി

കഴുത്തിൽ ചോര പൊട്ടിയൊഴുകുന്നു
കണ്ണു മൂടുന്നു..
മരിക്കാറായോ.. അറിയില്ല..കുട്ടികളുടെ ഒപ്പം വെയിൽ കായന് കിടന്നത് ഓർമയുണ്ട്..ഇടക്ക് കണ്ണുകൾ അടഞ്ഞുപോകുമ്പോൾ അവർ കളിക്കുന്നതാണ് കണ്ടത്..
പെട്ടെന്നു എവിടുന്നോ ഇടി നാദം പോലെ ദിക്കുകുലുക്കികൊണ്ടു വെടിയൊച്ച കേട്ടു..
കഴുത്തിനു താഴെ ചോരയുടെ ചൂട്..
ഉള്ളിൽ മുള്ളുകുത്തുന്ന വേദന..
പേടിച്ചു മാറി നിൽക്കുന്നുണ്ട് കുട്ടികൾ..
അവരെ അടുത്ത് വിളിക്കണം എന്ന് തോന്നി ..
പക്ഷെ ശരീരം അനങ്ങുന്നില്ല..
ശ്വാസത്തിന്റെ വേഗം ഇരട്ടിയാകുന്നു..
"ചത്തോ..?"
"ഇല്ല..പക്ഷെ ഇപ്പൊ ചാകും.."
"ഹമ്മ..ഇനി ഇതുങ്ങളെ എന്തു ചെയ്യും..?"
"അറിയില്ല.."
"ഇതുങ്ങളെ കൂടി അങ്ങു കൊന്നേക്ക്..വലുതായിട്ട എന്തിനാ.."
"താൻ ഒന്നു മിണ്ടതിരിക്കാഡോ..ഇതിനെ കൊന്നതിന് തന്നെ എന്തൊക്കെ പുലിവാല് വരും എന്ന് അറിയില്ല..അപ്പോഴാ.."
"പിന്നെ..ഇവിടെ മനുഷ്യന്മാർ ചാവുന്നു.. എന്നിട്ട് ആരും തിരിഞ്ഞു നോക്കുന്നില്ല..അപ്പോഴാ ഒരു പന്ന കടുവ.."

അവര് ഇതിനു മുന്പും ഇവിടെ വന്നിട്ടുണ്ട്..ആ ശബ്ദം ഇതിന് മുന്നേയും കേട്ടിട്ടുണ്ട്..അവർ മക്കളെ കൊല്ലും..തന്നെ കൊന്നപോലെ..തന്റെ പൂര്വികരെ കൊന്നപോലെ..കെട്ടിടങ്ങൾ കെട്ടിയുയർത്താൻ അവർക്ക് എന്റെ വീട് തകർക്കണം..മക്കളോട് ഓടിപോകണം എന്ന് പറയണം എന്നുണ്ട്..പക്ഷെ ദേഹമനങ്ങുന്നില്ല..മരണം തണുത്ത പുതപ്പ് പുതയ്ക്കുന്നു..അതിൽ ചൂടിന്റെ നേർത്ത വരകൾ സൃഷ്ടിച്ചു ചോരയൊഴുകുന്നു..

"താൻ അങ്ങോട്ട് മാറി നിലക്ക്..ഞാൻ കൊല്ലാം ഇവറ്റകളെ.."

പേടിച്ചു നിൽക്കുന്ന മക്കളെ നോക്കി അയാൾ തോക്കു ചൂണ്ടുന്നത് മനക്കണ്ണിൽ കാണാം..2 ഉണ്ടകൾ നിറച്ചു ലക്ഷ്യം വെക്കുന്നതും കാണാം..മക്കൾ ഭയന്ന് നിൽക്കുകയാണ്..അവരുടെ കാലുകൾ മണ്ണിൽ ഉറച്ചുപോയിരിക്കുന്നു..വയ്യ..ഇത് കണ്ടു നിക്കാൻ വയ്യ..അവരെ രക്ഷിക്കണം..

കുഞ്ഞുങ്ങൾക്ക് മേലേക്ക് എടുത്തു ചാടി
..വീണ്ടും ഒരു വെടിയൊച്ച..

കണ്ണുകൾ അവസാനമായി അടയുമ്പോൾ കുഞ്ഞുങ്ങൾ ഓടിമറയുന്നത് കണ്ടു..

പാട്ട്

വയറു കഴിയാൻ വകയുള്ളവൻ പാടിയത്
പ്രണയത്തെ കുറിച്ചായിരുന്നു..
വയറൊട്ടിയവന്റെ പാട്ട്
വിശപ്പിനെ കുറിചും..

ഒരു കർഷകന്റെ മരണമൊഴി

കരിയുന്ന വിള കണ്ടെരിയുന്ന നെഞ്ചും
തുരുമ്പ് തിന്നു തുലയുന്ന പണിയായുധങ്ങളും..
പുരയിൽ പതിവുകാരനായ പട്ടിണിയും..
വിത്തെടുത്തു വിശപ്പു മാറ്റുന്ന പൈതങ്ങളും..
മാറ്റ് കുറയുന്ന പൊന്നു പോലെ
മൂത്തവളൊരുത്തിയും..
കണ്ണടച്ചിരുട്ടക്കും മേലധികാരികളും..
കണ്ണീരു കാണാത്ത കോവിലിലെ ദൈവങ്ങളും..
വീതിച്ചെടുക്കുക..
പണയമായി നല്കാനിനിയൊന്നും ഇല്ലാത്ത
എന്റെ പിണം..

....

കാലിയായ കീശയും..
കരള് നിറയെ മോഹങ്ങളും...

ലഹരി

അമ്മയുടെ അമ്മിഞ്ഞപ്പാലായിരുന്നു
ആദ്യത്തെ ലഹരി..
അതില്ലാതെ വയ്യന്നോർത്തു
ആർത്തു കരഞ്ഞതിൽ പിന്നെ..
അങ്ങാടി മധുരം..
ചുണ്ടിൽ എരിയുന്ന ചൂട്ടു...
വയറു കരിയുന്ന മദ്യം..
രക്തമുറയുന്ന മരുന്ന്..
കയ്യിൽ ഉഴറുന്ന പെണ്ണ്..
ഒടുവിൽ അവസാന നാളിൽ
ആശുപത്രി കിടക്കയിൽ
ലഹരി ജീവനോടായി..

ചിലന്തി

വരാനിടയില്ലാത്ത ഇരയെ കാത്തു
വലവിരിച്ചിരിക്കുന്നുണ്ടൊരു ചിലന്തി..
വിശപ്പേറെ ഉണ്ടേലും..
വേറെ വഴിയവനറിയില്ല..

തിരിച്ചറിവ്

വയസ്സാകുമ്പോൾ അറിവ് കൂടുമത്രെ
ഇത്രയും കാലമറിഞ്ഞതൊന്നും
ഒരറിവായിരുന്നില്ലെന്ന
തിരിച്ചറിവ്..

നമ്പി

നഷ്ടമായ അവസരങ്ങൾക്ക്..
മരിച്ച ചിന്തകൾക്ക്..
നരച്ച ദിനങ്ങൾക്ക്...
നഷ്ടപരിഹാരം തന്നിട്ടിനി എന്ത് കാര്യം..?

തേൻ മിട്ടായികൾ

ഇടങ്കണ്ണിട്ട് നോക്കുമ്പോൾ..
കൊഞ്ഞനം കുത്തുന്ന
കണ്ണാടി ഭരണിയിലെ
തേൻ മിട്ടായികൾ..
ചില്ലറ തുട്ട് എണ്ണി നോക്കി
തികയാതെ ദണ്ണിച്ചു
തിരികെപോയ കുട്ടിയിന്നു
നോട്ടുമായ് വന്നപ്പോൾ..
മാർക്കറ്റ് വിട്ടു പോയി..

...

ഞാൻ മരിച്ചാലും നീ എന്നെ ഓർക്കുമോ..?
മരിച്ചിട്ടോർത്തിട്ടെന്ത് കാര്യം...
നീ പറയാതിരുന്നതെല്ലാം
അന്ന് എത്രയുച്ചത്തിൽ പറഞ്ഞാലും..
എന്റെ കല്ലറയുടെ വാതിൽ
കടന്നെത്തുകയില്ലലോ..

കാലൻ

വരാനാരുംമില്ലെങ്കിലും വീട്ടിൻമുന്നിൽ
ഒരു മണി കെട്ടിത്തൂക്കി..
ഒരുനാൾ മണിയൊച്ച കേട്ടു വന്നു നോക്കുമ്പോ..
മുന്നിൽ നിക്കണത് കാലൻ..

സുഹൃത്തിനോട്..

പറയാതെ അറിഞ്ഞ വിശേഷങ്ങളിൽ നിന്ന്..
പൊള്ളയായ സുഖാന്വേഷണത്തിലേക്ക്
നമ്മൾ എത്ര മാറിപ്പോയിരിക്കുന്നു..

ഫ്രീക്കന്റെ ആത്മഹത്യക്കുറിപ്പ്

ഇത് ആത്മഹത്യക്കുറിപ്പല്ല..
കൊലപാതകത്തിന്റെ സാക്ഷിമൊഴി..
എന്റെ ചിന്തകൾക്ക്
കഞ്ചാവിന്റെ മണമുണ്ടായിരുന്നില്ല..
എന്റെ പ്രണയത്തിന്
ലഹരിയുടെ കൂട്ടുണ്ടായിരുന്നില്ല..
എന്റെ നേര് നിങ്ങൾക്ക് ഒരു നുണ..
നിങ്ങളെഴുതി തള്ളിയ ജാതകത്തിൽ..
ഞാൻ കണ്ടത് രാജയോഗമായിരുന്നു..
നിങ്ങളെനിക്ക് തീർത്ത കൂട്
തകർത്തു ഞാൻ പോകുന്നു..
പൊരുതി മടുത്ത പോരാളിയെപോലെ..
എന്റെ ശവത്തിനു മേൽ നിങ്ങൾ പൂമാലയിടരുത്..
എന്റെ ചിരിക്കുന്ന ചിത്രം തൂക്കരുത്..
അരികിൽ വന്ന് നല്ലവാക്ക് പറയരുത്..
നിങ്ങളുടെ കൈയിൽ
എന്റെ ചോര വീണ് ചുവന്നിരിക്കുന്നു..

ബ്ലൂ വെയിൽ

നോക്കാൻ ഏല്പിച്ചു പോയ
യന്ത്രമനുഷ്യനേ നോക്കി
മുലപ്പാലിന് കരയുന്ന കുട്ടി..
താരാട്ടു പാടുന്ന പാട്ടുപെട്ടികൾ..
കണ്ണു മഞ്ഞളിക്കുന്ന ടിവി പരിപാടികൾ..
രോഗം വിളമ്പുന്ന ഹോട്ടൽ ഭക്ഷണം..
ചതി മണക്കുന്ന ഓണ്ലൈൻ പ്രണയം..
ഒടുവിൽ മരിക്കാൻ അവനു
മൊബൈലിൽ ഒരു ഗെയിമും..

ഇന്ന് ഞാൻ നാളെ നീ

കടലുകാണാൻ ഒക്കുമായിരുന്ന
കൊമ്പവർ മുറിച്ചു..
തണല് തന്ന കൈകളും അറുത്തു...
കാറ്റ് തഴുകുന്ന പൂക്കുലകളൊടിച്ചു..
കാത്തുവച്ചിരുന്ന കായ്കളും കട്ടു..
തന്നാരം കിളിയുടെ കൂടൊന്ന് തകർത്തു..
അവരുടെ പൈതങ്ങൾ ഉലകം കാണാതെ മരിച്ചു..
മഴുകൊണ്ട് വീഴുമ്പോൾ മരമോർത്തു..
ഇന്ന് ഞാൻ നാളെ നീ..

പുഷ്‌പാഞ്ജലി

പുലരി പുലരുമെന്നോർത്തു
മയങ്ങിക്കിടക്കുന്നുണ്ടൊരുനൂറു പൂക്കൾ..
ഇറുത്തു ചൂടാൻ വരും കൈകളെ അറിയാതെ..
ഇനിയൊരു കിരണവും തഴുകില്ലെന്നറിയാതെ..
ആഗ്രഹലബ്ദിക്ക് ദേവന്റെ കാൽകളിൽ..
ആയിരം കരിഞ്ഞ സ്വപ്നങ്ങളുടെ ചാമ്പൽ...

മനുഷ്യമാംസം

മനുഷ്യന്റെ മാംസത്തിനായിരിക്കും
ഏറ്റവും രുചി..
അതിൽ മദ്യത്തിൻ ലഹരി..
പ്രണയത്തിൻ മധുരം..
ദുർമേദസ്സിന്റെ കൊഴുപ്പ്..
ചിന്തകളുടെ എരിവ്..
വിരഹത്തിന്റെ കയ്പ്പ്..
ഉറപ്പ്..മനുഷ്യന്റെ മാംസത്തിനാണ്
ഏറ്റവും രുചി..

സുഖാന്വേഷണം

സുഖമാണോ എന്നന്വേഷിക്കുന്നവരോട്..
അത്ര സുഖമല്ല..
ഇരുണ്ട സ്വപ്നങ്ങൾ വേട്ടയാടുന്നുണ്ട്..
കനത്ത സംശയങ്ങൾ വന്നലട്ടുന്നുണ്ട്..
കുറച്ചു ചോദ്യങ്ങൾക്കുത്തരം തിരയേണ്ടതുണ്ട്..
പക്ഷെ പറയാൻ നിനക്ക് ഒരുത്തരം മാത്രം..
സുഖമാണ്..

കത്ത്

ദൂരെ നിന്ന് അച്ഛന്റെ കത്ത്..
തിരിച്ചെഴുത്തണം..
വാങ്ങേണ്ട മിട്ടായികളെ കുറിച്ച്..
കുഞ്ഞുടുപ്പുകളെ കുറിച്ചു..
കളർ പെൻസിലുകളെയും കളിക്കോപ്പുകളെയും കുറിച്ചു..
എഴുതാൻ മറക്കുന്ന ഒരേയൊരു കാര്യം
അച്ഛന്റെ സുഖവിവരം മാത്രം..

കാറ്റിന്റെ പാട്ട്

ദൂരെയൊരു തീവണ്ടി സൈറൻ..
ഇരമ്പുന്ന കടലിന്റെ കരച്ചിൽ..
കാറ്റുകൊണ്ടതന്ന കഥകൾ..
കാതോർത്തിരിക്കാറുണ്ടിപ്പോഴും..

ഭീരു

ഭീരുവാണ് ഞാൻ
പറയാൻ ഓർത്തത് വായിൽ വിഴുങ്ങി..
എഴുതാൻ നിനച്ചത് മായ്ച്ചു തിരുത്തി..
കണ്ണടച്ചിരുട്ടാക്കി..
കൈ മലർത്തുന്നു ഞാൻ..

മായം

മണമില്ലാ പ്ലാസ്റ്റിക് പൂക്കൾ..
മധുരം കുറഞ്ഞ അങ്ങാടി മാങ്ങകൾ.
പിന്നിൽ വന്നുകുത്തിയവന്റെ ചിരി
എനിക്ക് ചുറ്റും
എല്ലാത്തിലും മായം.

.....

വയസ്സായാൽ ഒരു മൂലക്ക് ഇരിക്കാനല്ല..
പുതിയ വഴികളിലൂടെ നടക്കാനാണിഷ്ടം
എന്ന് കാർത്യായനി